Ауыл мен шаһарды, қала мен даланы, ел мен елді, жер мен жерді жалғайтын күре жолдың жәйі күн тәртібінен түсер емес. Алысты-жақын, жақынды-алыс қылу көбіне сол жолдың күтімі, сапасы мен жағдайына байланысты. Былтырғы жылғы Үкіметтің кеңейтілген отырысында Президент Қасым-Жомарт Тоқаев тоғыз жолдың торабында тұрып құрылысы сағызша созылған күре жолдың мәселесін сынға алды.

Жалпы Дүниежүзілік экономикалық форумның рейтингісінде  Қазақстан жол са­пасы бойынша 141 елдің ішінде 93 орын­да тұр.  Көрсеткіште Тәжікстан мен Әзірбайжан әлдеқайда көш ілгері тұр. Тіпті, сарапшы­лар біздегі жолдар­дың сапасын Моңғо­лия, Уганда, Эфиопиядан да төмен бағалап отыр. Елімізде автожолдардың жалпы ұзын­дығы 96 мың шақырымға жетеді. Оның ішін­де 25 мың шақырымы – респуб­ликалық маңызы бар күрежолдар, 71 мың шақырымы – жергілікті жолдар.