Ауданымыздың аграрлық секторында 11 айда 31 млрд. 763 млн. теңгенің өнімі өндірілген. Бүгінгі таңда ауданымыздың ауыл шаруашылығы саласында 1500-ден астам агроқұрылым ел игілігін еселеу жолында табысты еңбек етуде. Биылғы жылы 96 016 гектар жерге егін себілсе, оны ң 49 516 га дәнді дақылдар, 35 343 га майлы дақылдар, 2000 га қант қызылшасы, 912 га картоп, 641 га көкөніс өнімдері. Бүгінгі күнге дәнді дақылдардан 117 мың тонна астық жиналып, орташа өнімділігі гектарына 24,8 центнерден айналды. Осынау ауыз толтырып айтарлық жетістіктер сәрсенбінің сәтінде өткен ауыл шаруашылық қызметкерлеріне арналған салтанатты жиында аудан әкімі Марат Разбековтың сөзіне арқау болды.
Аудандық мәдениет үйінде өткен басқосуда ауыл еңбеккерлерін кәсіби мерекелерімен құттықтаған Марат Мелісұлы ауданның ауыл шаруашылық саласында 2018 жылы атқарылған жұмысты қорытындылап, 2019 жылға межеленген негізгі бағыттар турасында жан-жақты баяндама жасады. Ауыл шаруашылығының жекелеген салаларының бүгінгі жай-күйін нақты сандармен саралаған аудан басшысы Елбасының биылғы Жолдауы жүктеп отырған міндеттерге тоқтала келе, Елбасының, Үкіметтің, облыс әкімінің агроөнеркәсіптік кешенді даму бағдарламаларын, тапсырмаларын сапалы орындауға бар күш-жігерді жұмсауға үндеді.
Салтанатты шара барысында сондай-ақ ауыл шаруашылығы бойынша ең үздік нәтиже көрсеткен ауылдық округтер анықталды. Ең үздікті анықтау мақсатында ауыл шаруашылығы саласы бойынша ағымдағы жылдың он бір айында атқарылған жұмыстарға жалпы көрсеткіштер негізінде сараптама жүргізілген болатын. Нәтижесінде Бақалы ауылдық округі бірінші орынды, Қарабөгет ауылдық округі екінші орынды, ал Екіаша ауылдық округі үшінші орынды иеленді.
Сондай-ақ, жекелеген ауыл шаруашылық салалары бойынша да үздік шаруа қожалықтар, кәсіпорындар мен озық кооперативтерге аудан әкімінің алғыс хаты және Сарқан аудан әкімінің құрмет грамоталары табысталды.
Тәуелсіздік мерекесіне орай ауданымыздың тумасы, Алматы облысының каратэ-до федерациясының президенті және «Ғалым ШҚ» басшысы Рахметқалиев Ғалым Болатұлы «Құрмет» орденімен марапатталды.
Шара соңында аудандық мәдениет үйінің өнерпаздары мерекеге орай ұйымдастырған концерттік бағдарламасын ұсынды.
Өз тілшіміз.
